足球女將2

2026年4月5號，Easter Sunday，瑩花完成咗佢哋S2嘅final game。同上季一樣，現實並唔係動漫情節，即使過程間幾熱血，付出過幾多汗同淚，結果都係唔可以靠一筆一畫改寫。現實總係殘酷，面對高一班嘅對手，賽果上，一年後嘅佢哋都係無贏。但係我眼中，今日佢哋已經贏咗。贏咗昨日嘅自己，亦順利完成S2要入波嘅目標。

我對足球唔係話非常了解，就只係一個小小嘅球迷，間唔中睇下英超歐聯世界盃咁。會開始睇波，都係因為中三升中四暑假果陣嘅世界盃。果陣嘅我，只係無聊湊下熱鬧而睇。而同好多香港人一樣，因為歷史源由，自然而然撐team england。當年有好多新力軍，不被外界睇好嘅england，係Harry Kane嘅帶領下攞到第四，而Harry Kane亦獲得當年嘅golden boot。就因為咁，我開始睇波，亦因為Harry Kane當時就係效力熱刺，我成咗一個spurs fan。熱刺最近嘅風雨就唔好再講，但如果下年真係要踢championship，我都係唔會鬼轉嘅。足球球迷就係咁忠誠，哈。而亦因為足球，當年揀u果陣，我亦將country呢樣野放入考量，因為我唔想去Scotland或者wales做一個england fan。足球或者就係有一種神奇魔力，可以將唔同嘅人拉近 (或者遠。i still hate gunners. nicely done at the FA cup)。亦可以令唔止踢果個，睇果個都會投入激動。足球員係場上揮灑血汗嘅畫面，往往可以感染觀眾，令大家都會係場外為球員歡呼吶喊。望住場內球員嘅認真奮戰，面對住一個未吹雞完場都未知嘅結果，刺激感油然而生。呢個亦係點解大家會睇波。

講返瑩花，足球女將之所以令人吸引，就係一個個畫面刻畫住唔同隊員嘅努力，將佢哋嘅熱血，透過鏡頭呈現比觀眾。觀眾就好似同佢哋一齊成長，見證住佢哋一點一滴嘅進步。呢個亦係點解睇瑩花比平時睇專業嘅足球比賽更加能夠捉住人心。坦白講，我自己個人更鍾意S1。但呢個並唔係節目製作上嘅問題，只係我比較鍾意由一張白紙，零的突破嘅故事線。S1嘅成員對足球比較無知，亦因為咁，令佢哋更加純粹，更加帶比我更深嘅感受。我相信無論做啲咩都好，每個人一開始做某件事，總係有一種天真魯莽，會好似一個小朋友咁跌跌撞撞。S1嘅佢哋就帶比我呢種感覺，令我哋記返起當初開始嘅原因，提醒我哋幾難都唔好放棄。相反，S2有S1嘅舊成員，佢哋經歷之前嘅訓練，已經蛻變成另一個人；新一季亦都有已經有足球底子，又或者本身有運動底子嘅新成員成入。新一季人馬當然比上一季高一班，亦可以做多好多之前做唔到嘅高技術嘢。同時，今季亦有唔同熱血故事，好似樂琳faye重拾足球、faye表妹克服傷患、vian嘅蛻變。唔係呢一啲故事唔值得記錄，亦唔係佢哋嘅故事唔夠熱血，純粹我個人比較鍾意一開始嘅果種純粹。好似啱啱出世嘅嬰兒牙牙學語，到見到佢哋起碼識行識走，果種感動比我嘅感覺完全唔同。

當然，S2嘅每一位都係值得每一位嘅掌聲、都係值得每一位去欣賞。足球從來都唔容易，訓練亦唔會輕鬆，每一個都係付出過好多努力，辛苦堅持捱過嚟。球場上嘅眼淚，從來都只係得兩個可能。今日佢哋嘅係因為付出所有終於要結束而喜極而泣，昨日係因為唔甘心而喊。運動員總係會唔甘心自己努力過但都無收穫，唔甘心自己無表現無進步。畢竟現實總係殘酷，即使努力過，都唔一定有收穫；但係無努力過，就一定唔會成功。見到今日終極一戰嘅瑩花每位成員，係滂沱大雨，全身濕晒之下係充滿雨水嘅草地上面踢波，並且做到猜傳 (雖然有時因為雨勢有時頗大而失波，但係天氣因素一定要體諒)，其實作為觀眾嘅我已經好感動。相比起S1，有提場、有組織、清到波、有大腳、識角球企位、攞到高空波等等等等，講真我已經好滿足。當然佢哋仲有好大嘅進步空間，每樣細節亦都有好多不足，但只係經歷咗短時間嘅操練，旁觀嘅我哋，仲可以要求啲咩？除咗集氣S3，我真係諗唔到了。

想同每一位瑩花嘅球員講聲well done，你哋真係已經做得好好。我諗可能未必每一位之後都一定會繼續踢，但都希望你哋嚟緊就先休息，比自己放個假 (well deserved)，然後再向你哋嘅目標迸發 (唔淨止足球！)

當天錯了再練夠六百次

今天我要讓你記住名字

讓血汗轉身去高聲對眼淚說

這硬仗仍然未打完 人仍然未輸

Let’s go, fighter

Let’s go 不怕跌倒

Let’s go, fighter

Let’s go 不怕再倒

信在某日某地挽著你呐喊著勝利

會做到